فارم 45 کہہ رہے ہیں کہ عوام نے جماعت اسلامی کو ووٹ ڈالا: حافظ نعیم الرحمٰن

04-25-2024

(لاہور نیوز) نو منتخب امیر جماعت اسلامی حافظ نعیم الرحمٰن کا کہنا ہے فارم 45 چیخ چیخ کر کہہ رہے ہیں کہ عوام نے پی ٹی آئی اور جماعت اسلامی کو ووٹ ڈالا۔

منصورہ میں حافظ نعیم الرحمٰن نے پہلی پریس کانفرنس کرتے ہوئے کہا کہ2024 کے الیکشن سب کے سامنے ہیں ، فارم 45 کہہ رہے ہیں کہ عوام نے پی ٹی آئی اور جماعت اسلامی کو ووٹ ڈالا لیکن فارم 47 کہہ رہے ہیں کہ ہم آمریت چاہتے ہیں، سپریم کورٹ کو چاہئے کہ فارم 45 کو بنیاد بنا کر ایکشن لے، عوام کو ان کی حکومت منتخب کرنے کا حق واپس دیا جائے۔ حافظ نعیم الرحمٰن نے مزید کہا کہ پاک ایران گیس پائپ لائن منصوبے پر کام لازمی ہونا چاہئے، امریکی محکمہ خارجہ کو حق کس نے دیا ہمارے اندرونی معاملات میں دخل دے، امریکہ کی سرپرستی میں چلتے رہے تو ہم پنپ نہیں سکتے، صدر زرداری سے کہتا ہوں وہ آگے آئیں اور معاملے پر بیان دیں۔ حافظ نعیم الرحمٰن نے کہا کہ ہم سب سے بات کرنا چاہتے ہیں لیکن ان سے کیسے بات کریں جو عوام کے حق پر ڈاکہ ڈال کر آئے ہیں، اگر جماعت اسلامی سڑکوں پر نکلی تو ان کو ویسے بھی جانا پڑے گا۔