خواجہ سعد رفیق کا ایکس پر پابندی ختم کرنے کا مطالبہ

04-18-2024

(ویب ڈیسک) رہنما مسلم لیگ ن خواجہ سعد رفیق نے حکومت سے ٹوئٹر (ایکس) پر پابندی ختم کرنے کا مطالبہ کیا ہے۔

سابق وفاقی وزیر خواجہ سعد رفیق نے سماجی رابطے کی ویب سائٹ ایکس پر ہی اپنے ایک پیغام میں کہا کہ ملک میں ٹوئٹر (ایکس) پر پابندی ختم کی جائے، نگران دور میں لگائی گئی اس پابندی کا کسی کو کوئی فائدہ نہیں ہوا۔ انہوں نے کہا کہ جگ ہنسائی سے بچاجائے، سیاست کا مقابلہ صرف سیاست سے ہوگا۔ واضح رہے کہ گزشتہ روز اسلام آباد ہائی کورٹ میں وزارت داخلہ اور پاکستان ٹیلی کمیونی کیشن اتھارٹی (پی ٹی اے) کی جانب سے رپورٹس جمع کرائے جانے کے باوجود ایکس کی سروس بحالی سے متعلق فیصلہ نہیں ہوسکا تھا۔ یاد رہے کہ پاکستان بھر میں 17 فروری سے ٹوئٹر (ایکس ) کی سروس معطل ہے اور گزشتہ دو ماہ کے دوران متعدد بار اس کی سروس کو جزوی طور پر بحال کیا گیا لیکن مکمل طور پر اسے آپریشنل نہ کیا جا سکا۔