لاہور کیلئے پانچ سالہ ترقیاتی پروگرام تیار، ایک کھرب بارہ ارب کا تخمینہ لگایا گیا

04-15-2024

(ویب ڈیسک) لاہور کے لئے پانچ سالہ ترقیاتی پروگرام تیار کر لیا گیا، شہر کے دو نئے داخلی و خارجی راستوں کا منصوبہ میگا پلان میں شامل ہے۔

ایل ڈی اے نے وزیراعلیٰ کو پانچ سالہ ڈویلپمنٹ پروگرام دینے کا فیصلہ کر لیا، ڈویلپمنٹ پروگرام میں لاہور شہر کے دو نئے داخلی راستے، ایلی ویٹڈ ایکسپریس وے، بلیو اور پرپل لائن کا سول سٹرکچر بھی شامل ہے، پانچ سالہ پروگرام پر ایک کھرب بارہ ارب کا تخمینہ لگایا گیا ہے، ایلی ویٹڈ ایکسپریس وے سے لاہور شہر کو نیا ٹریفک روٹ اور داخلی و خارجی راستہ فراہم ہو گا۔ سابق نگران حکومت کا کریم بلاک سے براستہ کھاڑک موٹروے تک شارٹ روٹ شامل کر لیا گیا ہے، بلیو لائن اور پرپل لائن کے سول سٹرکچر کی تعمیر کا تخمینہ اور پلان بھی شامل ہو گا، لاہور شہر میں مجوزہ انڈر پاسز اور فلائی اوورز کا منصوبہ بھی شامل کیا گیا ہے، گڑھی شاہو اور کریم بلاک پراجیکٹ بھی پانچ سالہ پلان کا حصہ ہوں گے، پلان کی حتمی منظوری وزیراعلیٰ پنجاب مریم نواز دیں گی۔ ایل ڈی اے کی جانب سے پانچ سالہ پروگرام پر ایک کھرب بیس ارب کا تخمینہ لگایا گیا ہے، ڈی جی ایل ڈی اے طاہر فاروق نے چیف انجینئر کی مشاورت سے پانچ سالہ ترقیاتی پروگرام تیار کیا ہے۔