پنجاب: عید کے ایام کے دوران ٹریفک حادثات میں 25افراد جاں بحق

04-12-2024

(لاہور نیوز) عید الفطر کے 2 دنوں میں پنجاب بھر میں مختلف ٹریفک حادثات کے دوران 25 افراد جان کی بازی ہار گئے۔

ریسکیو 1122 کے ترجمان کے مطابق عید الفطر کے پہلے 2 روز کے دوران صوبے بھر میں 4 ہزار 500 حادثات رپورٹ ہوئے، جن میں 4 ہزار 100 مرد اور ایک ہزار 2023 خواتین ایکسیڈنٹ کا شکار ہوئیں۔ ترجمان نے بتایا کہ سب سے زیادہ 770 حادثات صوبائی دارالحکومت لاہور میں رپورٹ ہوئے، حادثات کے نتیجے میں زخمی ہونے والے 2 ہزار 545 شدید زخمیوں کو ہسپتال منتقل کیا گیا جبکہ 2 ہزار 733 افراد کو موقع پر ہی ابتدائی طبی امداد فراہم کی گئی۔ ریسکیو ترجمان کے مطابق  عید کے دوران مختلف شہروں میں حادثات کے نتیجے میں 25 افراد زندگی کی بازی ہار گئے۔   ڈی جی ریسکیو 1122 ڈاکٹر رضوان نصیر نے حادثات میں قیمتی انسانی جانوں کے ضیاع اور تقریباً ڈھائی ہزار افراد کے زخمی ہونے پر تشویش کا اظہار کرتے ہوئے کہا کہ شہری سفر کے دوران ٹریفک قوانین پر عمل اور حفاظتی اقدامات کو یقینی بنائیں۔