پی آئی اے کی خاتون فضائی میزبان ٹورنٹو ایئرپورٹ پر گرفتار

03-29-2024

(لاہور نیوز) پی آئی اے کی لاہور سے ٹورنٹو کی پرواز کی خاتون فضائی میزبان کو ٹورنٹو ایئرپورٹ پر حراست میں لے لیا گیا ہے۔

ذرائع کے مطابق خاتون ایئر ہوسٹس سے مبینہ طور پر غیر متعلقہ پاسپورٹ برآمد ہوئے ہیں، ایئر  ہوسٹس کی شناخت حنا ثانی کے نام سے ہوئی ہے، ایئر ہوسٹس کو پہلے بھی ممنوعہ اشیاء لانے پر وارننگ دی گئی تھی۔ میڈیا ذرائع کے مطابق حنا ثانی نامی ایئر ہوسٹس معروف گلوکارہ کی عزیزہ ہیں، جبکہ خود بھی سوشل میڈیا ماڈلنگ کرتی ہیں جبکہ وہ ٹورنٹو سے لاہور کے لئے پرواز پی کے 789 پر تعینات تھیں۔ دوسری جانب پرواز پر حنا ثانی کے ہمراہ 7 دیگر فضائی میزبانوں کو بھیجا گیا تھا، جن کو ٹورنٹو کے لئے ایئر لائن نے نو فلائی ڈکلیئر کیا ہوا تھا۔ تاہم اس عملے کی خصوصی اجازت ڈی جی ایم فلائٹ سروسز کی جانب سے دی گئی تھی جو کہ روٹین سے ہٹ کر ہے، دیگر 2 ایئر ہوسٹس سے بھی پوچھ گچھ کی تھی، جس کے بعد کینیڈین حکام نے دونوں کو ہوٹل جانے کی اجازت دے دی۔ اس حوالے سے پاکستان انٹرنیشنل ایئرلائن کے ترجمان عبداللہ خان کا بھی ردعمل سامنے آ گیا ہے، ترجمان کے مطابق واقعے کے بارے میں آگاہ ہیں، کینیڈین حکام سے رابطے میں ہیں۔