سمندر پار پاکستانی عازمین حج کو پاسپورٹ کے اجرا کیلئے نئی پالیسی مرتب

03-27-2024

(لاہور نیوز) سمندر پار پاکستانی عازمین حج کیلئے خوشخبری، پرائیویٹ حج سکیم کے عازمین کو پاسپورٹ کے اجرا کے حوالے سے پالیسی مرتب کر دی گئی۔

ذرائع کے مطابق نئی پالیسی سے سمندر پار پاکستانیوں کو پاسپورٹ کے اجرا اور تجدید کے عمل میں آسانی ہو گی، دوہری شہریت کے حامل پاکستانی عازمین کو پاسپورٹ کیلئے کئی کئی ماہ انتظار کرنا پڑ رہا تھا۔ وزارت مذہبی امور کی کوششیں رنگ لے آئیں، پاسپورٹ کا اجرا جلد شروع ہو جائے گا، نئی پالیسی کے تحت دوہری شہریت کے حامل عازمین حج کی کلیئرنس 7 دن میں کرنا ہو گی، 7 دن میں کلیئرنس نہ ہونے پر خود بخود کلیئرنس تصور کی جائے گی۔ ذرائع کے مطابق اس کلیئرنس کی بنیاد پر عارضی پاسپورٹ جاری کر دیا جائے گا، وزارت مذہبی امور  نے محکمہ پاسپورٹ کے حکام سے رابطہ کر کے صورتحال سے آگاہ کیا تھا۔ وزارت مذہبی امور کے ذرائع نے بتایا کہ 28 ہزار سرکاری عازمین حج کو گزشتہ ماہ تین روز میں پاسپورٹ فراہمی ممکن بنائی گئی تھی، بروقت پاسپورٹ نہ ملنے سے بائیو میٹرک تصدیق کا عمل متاثر ہو رہا تھا۔ ذرائع کے مطابق محکمہ پاسپورٹ حکام  نے عازمین حج کو فوری پاسپورٹ فراہمی کی یقین دہانی کرائی تھی، پاسپورٹ کا اجرا نہ ہونے کے سبب عازمین حج شدید پریشانی کا شکار تھے۔