وزیر اعلی پنجاب کی ٹریفک پولیس کو سیفٹی وائر گارڈ کی پابندی کرانے کی ہدایت

03-27-2024

(لاہور نیوز) وزیراعلیٰ پنجاب مریم نواز نے ٹریفک پولیس کو موٹربائیکس پر سیفٹی وائر گارڈ کی پابندی کرانے کی ہدایت کردی۔

وزیر اعلیٰ مریم نواز شریف نے آبشار خدمت مرکز کا دورہ  کیا، انہوں نے مختلف کاونٹرز کا معائنہ کیا اورسیلف آپریٹنگ سسٹم کا بھی جائزہ لیا،مریم نواز شریف نے آٹو میٹڈ سٹیمولیٹر پر ڈرائیو بھی کی۔ مریم نواز شریف نے آبشار خدمت مرکز میں موجود شہریوں سے ملاقات کی اور سہولتوں کے حوالے سے دریافت کیا،سی ٹی او عمارہ اطہر نے وزیر اعلیٰ پنجاب کو سیفٹی وائرز  کے حوالے سے بریفنگ دی۔ بریفنگ میں وزیراعلیٰ کو بتایا گیا کہ سیفٹی وائرز  نہ ہونے کی وجہ سے چالان نہیں ہوگا تاہم یہ عوام کے تحفظ کے لئے ضروری ہیں۔ وزیر اعلیٰ پنجاب  نے  آبشار خدمت مرکز میں سیفٹی وائر گارڈز مہم کا آغاز کیا، انہوں نے دھاتی ڈور سے بچاؤ کے لئے سیفٹی وائرز شہریوں میں تقسیم کیں اور موٹر بائیکس سواروں کو سیفٹی وائر گارڈ نہ اتارنے کی ہدایت کی۔ اس موقع پر گفتگو کرتے ہوئے وزیراعلیٰ پنجاب مریم نواز کا کہنا تھا کہ دھاتی ڈور اور پتنگ بازی کے خونی کھیل میں ملوث افراد کے خلاف کریک ڈاؤن جاری ہے،کسی کو عوام کی زندگیوں سے کھیلنے کی اجازت نہیں دیں گے۔