پاکستان سمیت دنیا بھر میں آج ہندو برادری اپنا مذہبی تہوار ہولی منارہی ہے

03-25-2024

(لاہور نیوز) پاکستان سمیت دنیا بھر میں آج ہندو برادری اپنا رنگوں بھرا مذہبی تہوار ہولی بھرپور جوش و خروش کے ساتھ منارہی ہے۔

 بہار کے موسم کی آمد پر منائے جانے والے ہندوؤں کے مذہبی تہوار ہولی کو ’رنگوں کا تہوار‘ بھی کہا جاتا ہے، ہولی کی تقریبات دو دن چلتی ہیں، پہلے دن مختلف رسومات ادا ہوتی ہیں اور دوسرے دن رنگ بکھیرے جاتے ہیں، بچے اور بڑے ایک دوسرے پر رنگ پھینکتے ہیں۔ ملک بھر بالخصوص صوبہ سندھ کے علاقوں مٹھی، حیدرآباد، جیکب آباد، تھرپارکر میں ہولی کی تقریب میں ہندوؤں کیساتھ مسلم برادری کے افراد شرکت کر کے رواداری اور مذہبی ہم آہنگی کا اظہار کرتے ہیں۔ وزیراعلیٰ پنجاب کا"ہولی پیکیج" کا اعلان ادھر وزیر اعلیٰ پنجاب مریم نواز نے ہندو برادری سے تعلق رکھنے والے 700 خاندانوں کو ’’ہولی‘‘ کے موقع ہولی پیکیج دینے کا اعلان کر دیا، ہولی کی خوشیاں دوبالا کرنے کیلئے فی کس 10 ہزار روپے دیئے جائیں گے، فنڈز جاری کر کے متعلقہ ڈپٹی کمشنرز تک پہنچا دیئے گئے۔ وزیر اعلیٰ ہاؤس کی جانب سے مزید بتایا گیا کہ پیکیج کے اعلان میں مسلم لیگ (ن) کی راحیلہ خادم حسین اور پنجاب کمیٹی ممبران کی خصوصی کاوش شامل ہے، یہ حکومت ہر شہری اور ہر فرد کی نمائندہ حکومت ہے۔