شہر میں پتنگ بازی کرنے والوں کیخلاف پولیس نے کمر کس لی
03-17-2024
(لاہور نیوز) شہر میں خونی کھیل کھیلنے والوں کے خلاف پولیس نے کمر کس لی۔
رمضان المبارک میں بھی پتنگ بازی ترک نہ کرنے والوں کی شامت آگئی،سٹی اور اقبال ٹاؤن ڈویژن پولیس نے پتنگ بازی کے خلاف کریک ڈاؤن کے دوران 24 گھنٹوں میں 29 مقدمات درج کرکے 45 سے زائد پتنگ بازوں کو دھرلیا۔ ایس پی سٹی کیپٹن ریٹائرڈ قاضی علی رضا کا کہناہے کہ ملزمان کے قبضہ سے ہزاروں روپے کی پتنگیں، کیمیکل ڈور کی چرخیوں سمیت پتنگ سازی کا خام مال برآمد کیاگیا ہے۔ ادھر اقبال ٹاؤن ڈویژن کی حدود میں بھی پولیس کی خصوصی ٹیمیں سرگرم ہیں، پولیس کی جانب سے رات کے وقت پتنگ بازی میں مصروف27 افراد کو گرفتار کر لیا گیا۔ ایس پی اخلاق الله تارڑ کا کہناہے کہ خونی کھیل کھیلنے والوں کے خلاف سخت کارروائی عمل میں لائی جائے گی۔ کینٹ ڈویژن پولیس حکام کی جانب سے بھی سحر و افطار میں انسداد پتنگ بازی کی ٹیموں کو الرٹ رہنے کی ہدایت کی گئی ہے۔ ایس پی کینٹ اویس شفیق کا کہنا ہے کہ دوران گشت گاڑیوں پر اعلان کر کے شہریوں کو آگاہ کیا جا رہا ہےکہ پتنگ بازی نہ کی جائے، پتنگ بازی کی روک تھام کے لیےشہری پولیس کے ساتھ تعاون کریں۔