کاروں کی فروخت میں سالانہ بنیادوں پر 41 فیصد کمی ریکارڈ

03-14-2024

(ویب ڈیسک) رواں مالی سال کے پہلے 8 ماہ کے دوران ملک میں کاروں کی فروخت میں سالانہ بنیادوں پر 41 فیصد کمی آگئی۔

پاکستان آٹو مینوفیکچررز ایسوسی ایشن کے اعدادوشمار کے مطابق جولائی سے  فروری کے دوران ملک میں کاروں کے 46 ہزار 417 یونٹس فروخت ہوئے جو گزشتہ مالی سال کی اسی مدت کے مقابلے میں 41 فیصد کم ہے، گزشتہ سال کی اسی مدت میں 78 ہزار 575 یونٹس فروخت ہوئے تھے۔ اس دوران 1300 اور اس سے زائد سی سی کی کاروں کے 20 ہزار 373  یونٹس فروخت ہوئے جوکہ گزشتہ سال کی اسی مدت کے مقابلے میں 45 فیصد کم ہے، گزشتہ مالی سال کی اسی مدت میں 1300 اور اس سے زائد سی سی کی کاروں کے 36 ہزار 999 یونٹس کی فروخت ہوئی۔ اسی طرح ایک ہزار سی سی کے 4 ہزار 786  یونٹس فروخت ہوئے جوکہ گزشتہ سال کی اسی مدت کے مقابلے میں53 فیصد کم ہے، گزشتہ مالی سال کی اسی مدت میں 1000سی سی کے 10 ہزار 291 یونٹس فروخت ہوئے۔ اسی مدت میں 1000 سی سی سے کم پاور کے 21 ہزار 258 یونٹس فروخت ہوئے  جوکہ گزشتہ سال کی اسی مدت کے مقابلے میں 32 فیصد کم ہے، گزشتہ سال کی اسی مدت میں 1000 سی سی سے کم پاور کے 31 ہزار 285 یونٹس کی فروخت ہوئی تھی۔