ماہ رمضان میں افطاری سے سحری تک ریسٹورنٹس کھولنے کی اجازت

03-13-2024

(لاہور نیوز) لاہور ہائیکورٹ نے ریسٹورنٹس کو رمضان کے مہینے میں افطاری سے لیکر سحری تک کھلا رکھنے کی اجازت دے دی۔

لاہور ہائیکورٹ کے جج جسٹس شاہد کریم نے تدارک سموگ سے متعلق دائر  درخواستوں پر گزشتہ سماعت کا تحریری حکم جاری کردیا۔  عدالت نے سکولوں کے بچوں کو ہفتے میں ایک روز ماحولیات سے متعلق پریکٹیکل کروانے کی ہدایت کردی، عدالت نے کہا کہ جوڈیشل واٹر کمیشن کی رپورٹ کے مطابق سکولز بچوں کے سلیبس میں ماحولیات سے متعلق چیزیں شامل کرلیں اور آئندہ سماعت پر سلیبس سے متعلق رپورٹ پیش کی جائے۔ عدالت نے ایل ڈبلیو ایم سی سے سکول و کالجز کے بچوں کے ساتھ کمیونٹی سروسز صفائی کی مہم کا حتمی پلان بھی طلب کرلیا۔ عدالتی حکم میں لکھا گیا ہے کہ سرکاری وکیل کی رپورٹ کے مطابق تمام ٹائر جلانے والے یونٹس کے بجلی کے کنکشن منقطع کردیئے گئے ہیں، خلاف ورزی کرنے والے یونٹس کے تمام بجلی کے کنکشن منقطع کرنے کی ہدایات کردی ہیں۔ عدالت نے تحریری حکم میں مزید کہا ہے کہ سرکاری رپورٹ کے مطابق لیسکو اہلکاروں کو درختوں کی کٹائی سے روکنے کی بھی ہدایات جاری کی ہیں، لیسکو سٹاف نے اگر کوئی درخت کاٹنا ہو تو پہلے پی ایچ اے کو آگاہ کرے۔