وزیراعلیٰ مریم نواز کا اچانک پونچھ ہاؤس میں ماڈل رمضان بازار کے کنٹرول روم کا دورہ

03-10-2024

(لاہور نیوز) وزیراعلیٰ پنجاب مریم نواز شریف اچانک پونچھ ہاؤس میں ماڈل رمضان بازار کے کنٹرول روم پہنچ گئیں۔

وزیراعلیٰ مریم نواز شریف نے صوبائی ماڈل بازار کنٹرول روم میں مانیٹرنگ کاجائزہ لیا ، ڈسٹرکٹ ڈیش بورڈ اورپی آئی ٹی بی کے ڈیش بورڈ کا مشاہدہ کیا۔ وزیراعلیٰ مریم نواز نے قیمت ایپ ڈیش بورڈ کا بھی جائزہ لیا اور ڈیش بورڈ پر پیش کردہ اعدادو شمار کے بارے میں آگاہی حاصل کی۔ وزیراعلیٰ نے رمضان پیکج کی گھروں میں ترسیل کی مانیٹرنگ کی ضرورت پر زور دیا۔ وزیراعلیٰ مریم نواز شریف کا کہنا ہے کہ عوام کو ان کا حق ان کی دہلیز پر پہنچانا چاہتے ہیں،رکاوٹ یا غفلت برداشت نہیں کریں گے، عوام کو قطاروں میں نہیں لگنے دیں گے،ان کے گھروں میں ان کا حق پہنچائیں گے، رمضان پیکج اوردیگر امور کے بارے میں ڈسٹرکٹ سکور کارڈ بنایا جائے گا،خلاف ورزی کی صورت میں نمبر کم ہوں گے۔ وزیراعلیٰ مریم نوازشریف نے گھر میں ترسیل کی اطلاع بھی ڈیش بورڈ میں شامل کرنے کی ہدایت کی۔ وزیراعلیٰ کو بریفنگ میں بتایا گیا کہ 10رمضان تک تمام ضرورت مندوں تک رمضان نگہبان پیکج پہنچ جائیں گے۔ چیف سیکرٹری زاہد زمان اختر،سیکرٹری انڈسٹری احسان بھٹہ،ڈی جی انڈسٹریز آصف علی فرخ بھی اس موقع پر موجود تھے۔