الحمرا ہال میں پنجاب پولیس کے زیر اہتمام شارٹ فلم "حلف" کا پریمیئر

03-08-2024

(لاہور نیوز) الحمرا ہال میں پنجاب پولیس کے زیر اہتمام شارٹ فلم "حلف" کا پریمیئر ہوا۔

فلمسٹار معمر رانا، سینئر فنکار راشد محمود سمیت فنکاروں کی کثیر تعداد نے پریمیئر میں شرکت کی، فرینڈز آف پولیس، والنٹیرز ان پولیس طلبا و طالبات کی بڑی تعداد الحمرا ہال میں موجود تھی، پولیس شہداء کے اہل خانہ اور بچوں نے بطور مہمان خصوصی شرکت کی، ایڈیشنل آئی جی آپریشنز پنجاب شہزادہ سلطان نے شرکا کو خوش آمدید کہا۔ اس موقع پر گفتگو کرتے ہوئے ایڈیشنل آئی جی آپریشنز پنجاب شہزادہ سلطان نے کہا پنجاب پولیس کا حقیقی تشخص اجاگر کرنے کیلئے فلم فیسٹیول کا انعقاد کیا گیا، نوجوان باصلاحیت فلم میکرز کی تیار کردہ 04 فلمیں فیسٹیول کیلئے منتخب ہوئیں، پنجاب پولیس عوام کی جان و مال کے تحفظ کے ساتھ تعمیری سرگرمیوں کے فروغ میں اپنا حصہ ڈال رہی ہے۔ ندیم چیمہ فلمز کی پروڈکشن "حلف" پنجاب پولیس فلم فیسٹیول میں دوسری بہترین فلم قرار پائی، "حلف" فلم کے پروڈیوسر ڈائریکٹر ندیم چیمہ نے فیسٹیول کے انعقاد پر پنجاب پولیس کا شکریہ ادا کیا۔