پنجاب میں جنگلی حیات کے تحفظ کیلئے جامع اور مؤثر اقدامات کریں گے: مریم نواز

03-03-2024

(لاہور نیوز) وزیراعلیٰ پنجاب مریم نواز نے کہا ہے کہ صوبے میں جنگلی حیات کے تحفظ کے لیے جامع اور مؤثر اقدامات کریں گے۔

جنگلی حیات کے عالمی دن پر اپنے ایک  پیغام میں وزیراعلیٰ مریم نواز کا کہنا تھا کہ ماحولیاتی توازن برقرار رکھنے میں جنگلی حیات کے کردار کی اہمیت سے انکار ممکن نہیں، بائیوڈائیورسٹی کی اہمیت کو سمجھتے ہوئے ماحولیاتی توازن لانے میں پنجاب حکومت بھرپور اقدامات کرے گی۔ انہوں نے کہا کہ پنجاب میں سالٹ رینج کے علاقے میں پائی جانے والی جنگلی بھیڑ،چولستان کے تلورسے لے کر ڈولفن تک ہر طرح کی جنگلی حیات کا تحفظ اولین ترجیح ہے۔ مریم نواز نے مزید کہا کہ پورے پاکستان کی طرح پنجاب کو قدرت نے خوبصورت جنگلی حیات سے نوازا ہے جس کا تحفظ اور فروغ ہماری ذمہ داری ہے، جنگلی حیات کے عالمی دِن پر اس شعبے میں خدمات انجام دینے والے کارکنوں اور تنظیموں کو خراج تحسین پیش کرتی ہوں۔