’دو سٹارز ایک گھر میں نہیں رہ سکتے‘یاسر حسین نے شوبز میں طلاق کی وجہ بتادی

02-22-2024

(ویب ڈیسک) پاکستانی اداکار و رائٹر یاسر حسین نے شوبز سٹارز کے درمیان طلاق کی شرح میں اضافے کی بڑی وجہ بتا دی۔

یاسر حسین نے حال ہی میں ملیحہ رحمان کے پروگرام میں شرکت کی جہاں میزبان نے اداکار سے سوال کیا کہ شوبز انڈسٹری میں ہونے والی شادیاں ناکام کیوں ہوجاتی ہیں؟ اس سوال کے جواب میں یاسر حسین نے کہا کہ دو اداکاروں کے درمیان ہونے والی شادی تو کامیاب ہوسکتی ہے لیکن دو سٹارز کی شادی کا کامیاب ہونا بہت ہی مشکل ہے کیونکہ جب میاں بیوی دونوں ہی سٹارز ہوتے ہیں تو اُن کے درمیان سب سے بڑا مسئلہ انا کا ہوتا ہے جس کی وجہ سے رشتہ خراب ہوتا ہے۔ یاسر حسین نے کہا کہ میرے گھر میں صرف ایک ہی سٹار ہے وہ سٹار اقرا ہے اور مجھے اپنی بیوی کو سٹار کہنے میں بالکل برا نہیں لگتا، اسی وجہ سے ہماری شادی کامیاب ہے۔ اُنہوں نے کہا کہ میں نے شادی سے پہلے ہی فیصلہ کرلیا تھا کہ ہمارے گھر میں صرف ایک ہی سٹار ہوگا اور وہ سٹار اقرا ہے کیونکہ اقرا کو اُن کے کام کی وجہ سے بہت پسند کیا جاتا ہے، وہ سوشل میڈیا پر مجھ سے زیادہ مقبول ہیں، اسی لیے میرے لیے وہ ہی سٹار ہیں۔ اداکار نے کہا کہ انڈسٹری میں ان ہی جوڑوں کے درمیان طلاق ہوئی ہے جن میں میاں بیوی دونوں ہی سٹارز تھے کیونکہ سٹارز میں انا زیادہ ہوتی ہے، میں یہ نہیں کہہ رہا کہ ان کی طلاق صرف انا کی وجہ سے ہوئی، شاید کوئی دوسری بات بھی ہوسکتی ہے کیونکہ میں کسی سے ذاتی طور پر نہیں ملتا لیکن مجھے ایسا لگتا ہے کہ سب سے بڑی وجہ انا ہی ہے۔ یاسر حسین نے مزید کہا کہ دو سٹارز کبھی بھی ایک جگہ رہ ہی نہیں سکتے، اکثر فلموں اور ڈراموں میں دو سٹارز کے درمیان جھگڑے ہوجاتے ہیں، اُن کے میک اپ رومز الگ ہوجاتے ہیں تو پھر ایک گھر میں کیسے رہ سکتے ہیں۔ واضح رہے کہ پاکستانی شوبز انڈسٹری میں کئی جوڑوں کی طلاق کی خبریں سامنے آئی ہیں جن میں احد رضا میر اور سجل، ثنا جاوید اور عمیر جیسوال، آغا علی اور حنا الطاف، عمران اشرف اور کرن اشفاق، شہروز سبزواری اور سائرہ یوسف، فریال محمود اور دانیال راحیل سمیت دیگر شامل ہیں۔