کیوی مزاج میں بہتری کے لیے انتہائی مؤثر ہے: تحقیق

02-14-2024

(ویب ڈیسک) ایک تحقیق میں انکشاف کیا گیا ہے کہ کیوی پھل کھانے سے چار دنوں کے اندر مزاج میں بہتری آ سکتی ہے۔

کیوی میں بھرپور مقدار میں وٹامن سی  پایا جاتا ہے۔ وٹامن سی کے متعلق ہمیشہ سے یہ خیال رہا ہے کہ انسانی صحت کی بہتری میں اس کا بڑا کردار ہوتا ہے اور اب محققین کا ماننا ہے کہ یہ پھل وٹامن سی کے سپلیمنٹ سے زیادہ تیز اور دیرپا وٹامن سی فراہم کرتا ہے۔ نیوزی لینڈ میں قائم یونیورسٹی آف اوٹاگو کی ٹیم نے آٹھ ہفتوں تک ایک تحقیق میں وٹامن سی کی کمی کا شکار 155 افراد میں غذاؤں کے اثرات کا جائزہ لیا۔ شرکاء کو تین گروہوں میں تقسیم کیا گیا جس میں ایک کو وٹامن سی سپلیمنٹ، دوسرے کو پلیسیبو (غیر فعال دوا جس کے کوئی اثرات نہیں ہوتے) جبکہ تیسرے گروپ کو روزانہ دو کیوی کھلائے گئے۔ بعد ازاں ان افراد نے سمارٹ فون سروے کے ذریعے اپنی طبیعت، مزاج اور نیند کے معیار کے ساتھ جسمانی سرگرمی کے متعلق بتایا۔ برٹش جرنل آف نیوٹریشن میں شائع ہونے والی تحقیق میں بتایا گیا کہ کیوی کے سبب طبیعت اور مزاج میں چار روز کے اندر بہتری دیکھی گئی اور یہ اثر 14 سے 16 روز کے درمیان اپنے کمال کو پہنچا۔ دوسری جانب وٹامن سی سپلیمنٹ کے سبب 12 دنوں میں معمولی سی تبدیلی دیکھی گئی۔ تحقیق کے سربراہ ڈاکٹر بین فلیچر کا کہنا تھا کہ یہ تحقیق ہمیں یہ جاننے میں مدد دیتی ہے کہ جو ہم کھاتے ہیں اس کے ہمارے احساسات پر فوری اثرات ہوسکتے ہیں۔