تباہ کن ان سوئنگ یارکر پر بولڈ! وقار یونس کی تعریف پر بمراہ کا ردعمل آگیا

02-07-2024

(ویب ڈیسک) جسپریت بمراہ کے یارکر کی سابق پاکستانی لیجنڈ وقار یونس نے تعریف کی تھی، اب اس پر پیسر نے اپنا ردعمل دیا ہے۔

بھارتی پیسر بمراہ نے دوسرے ٹیسٹ میچ میں شاندار بولنگ کا مظاہرہ کیا تھا، ان کی ایک تباہ کن ان سوئنگ یارکر پر پہلے ٹیسٹ کے ہیرو انگلش بیٹر اولی پوپ بالکل بھی سنبھل نہیں پائے تھے اور کلین بولڈ ہوگئے تھے۔ وقار یونس سے ایک مداح نے سوال کیا تھا بمراہ کے یارکر نے انہیں کس کی یاد دلائی، جس کے جواب میں سابق کرکٹر نے اپنا ردعمل دیتے ہوئے جسپریت بمراہ کی تعریف کی تھی۔ یارکر ماسٹر پاکستانی لیجنڈ وقار یونس کا بھارتی پیسر کے یارکر پر اظہار خیال کرتے ہوئے کہنا تھا کہ ’میں کسی اور کے بارے میں ایسا سوچ بھی نہیں سکتا، یہ بمراہ کا ہی جادو تھا!‘ پاکستانی عظیم باؤلر کی تعریف سے بمراہ خود بھی آگاہ تھے انہوں نے اس پر اپنے خیالات کا اظہار کرتے ہوئے کہا کہ ’میں نمبروں کو نہیں دیکھتا، اگر آپ نمبرز کے بارے میں سوچتے ہیں تو بہت دباؤ آجاتا ہے۔ انہوں نے کہا کہ میں بہت خوش ہوں کہ ہم نے میچ جیت لیا اور میں نے اس میں اپنا حصہ ڈالا، نوجوانی کے دور میں میں نے ٹینس بال سے یارکر ڈیلیوری سیکھی تھی۔ اس وقت مجھے لگتا تھا کہ وکٹیں لینے کا یہی واحد طریقہ ہے، میں نے کرکٹ کے لیجنڈز جیسے وقار، وسیم اور ظہیر خان کو بھی دیکھا ہے۔ واضح رہے کہ اس میچ میں بھارت کے یشسوی جیسوال نے ڈبل سنچری اور شبمن گل نے سنچری سکور کی تھی۔ تاہم بمراہ کو ان کی تباہ کن بولنگ اور 9 وکٹیں حاصل کرنے پر مین آف دی میچ کے ایوارڈ سے نوازا گیا تھا۔