ڈرائیونگ لائسنس فیسوں میں اضافے کیخلاف درخواست پر فریقین سے جواب طلب

02-07-2024

(لاہور نیوز) لاہور ہائیکورٹ نے ڈرائیونگ لائسنس فیسوں میں اضافے کیخلاف درخواست پر فریقین سے جواب طلب کرلیا۔

لاہور ہائیکورٹ کے جج جسٹس ساجد محمود سیٹھی نے ڈرائیونگ لائسنس فیسوں میں اضافے کیخلاف سینئر قانون دان غلام عباس ہرل کی درخواست پر سماعت کی، درخواست میں نگران پنجاب حکومت، آئی جی پنجاب سمیت دیگر کو فریق بنایا گیا ہے۔ درخواست گزار نے مؤقف اختیار کیا کہ  ڈرائیونگ لائسنس کی فیسوں میں اضافہ قانون کے منافی ہے، نگران حکومت کے پاس اضافی ٹیکسز لگا کر فیسوں میں اضافے کا اختیار نہیں ہے، نگران حکومت روزمرہ کے معاملات چلانے کے لیے ہے فیسیں بڑھانا اس کے اختیار میں نہیں ۔  درخواست گزار نے استدعا کی کہ لاہور ہائیکورٹ ڈرائیونگ لائسنس کی فیسوں میں اضافے کا نوٹیفکیشن کالعدم قرار دے، عدالت پرانے ریٹس پر ہی ڈرائیونگ لائسنس بنانے کا حکم جاری کرے۔ عدالت نے  چیف سیکرٹری اور آئی جی پنجاب سمیت دیگر فریقین کو نوٹس جاری کرتے ہوئے تحریری جواب طلب کر لیا، لاہور ہائیکورٹ  نے سرکاری وکیل کو آئندہ سماعت تک مکمل تفصیلی جواب جمع کرانے کا حکم دے دیا۔