آئی ایم ایف نے پی آئی اے کی نجکاری کا پلان منظور کر لیا

02-06-2024

(لاہور نیوز) عالمی مالیاتی فنڈ (آئی ایم ایف) نے پی آئی اے کی نجکاری کا پلان منظور کر لیا۔

ذرائع نجکاری کمیشن کے مطابق آئی ایم ایف حکام کے ساتھ وزارت نجکاری اور وزارت خزانہ حکام کے مذاکرات کامیاب ہو گئے۔ ذرائع کے مطابق آئی ایم ایف نے کہا ہے کہ بنکوں کو پی آئی اے کے قرض پر سود کی ادائیگیوں کا بوجھ ایک سال سے زائد عرصے کیلئے نہ ہو، پی آئی اے کی نجکاری ایک سال کے عرصے میں کر کے قرض ادائیگیوں کا پلان مرتب کیا جائے گا۔ ذرائع نے مزید کہا ہے کہ پی آئی اے کی نجکاری کے بعد روز ویلٹ ہوٹل اور پی آئی اے کے ڈیوڈنڈ سے قرض ادائیگیوں کا پلان مرتب کیے جانے کا امکان ہے۔ کابینہ سے منظوری پر کمرشل بنکوں کی جانب سے پی آئی اے پر ادائیگیوں کا چارج ختم ہونے سے نجکاری جلد ہو گی، پی آئی اے قرض ری شیڈولنگ پلان پر رواں ہفتے کے دوران آئی ایم ایف سے مزید بھی بات چیت جاری رہے گی۔ ذرائع نجکاری کمیشن کے مطابق پی آئی اے کے قرض ری شیڈول پلان کی حتمی منظوری وفاقی کابینہ سے لی جائے گی۔