بابراعظم، رضوان کی اوپننگ جوڑی توڑنے پر عماد وسیم بھی بول پڑے

02-02-2024

(ویب ڈیسک) قومی ٹیم کے سابق آل راؤنڈر عماد وسیم بھی بابراعظم اور محمد رضوان کی اوپننگ جوڑی کو تبدیل کرنے پر بول پڑے ۔

مقامی ویب سائٹ کو انٹرویو دیتے ہوئے سابق آل راؤنڈر عماد وسیم نے کہا کہ اگر ٹیم مینجمنٹ نے بابراعظم اور محمد رضوان کی اوپننگ جوڑی کو تبدیل کرنے کا فیصلہ کیا ہے تو انہیں نوجوان کرکٹر کو مواقع دینا ہوں گے، دو چار اننگز کی بنیاد پر کسی کا فیصلہ نہیں ہونا چاہیے۔ انہوں نے کہا کہ آئی سی سی ٹی20 ورلڈکپ سے قبل ہمارے پاس 12 میچز موجود ہیں، ہمیں یہ بات ماننی چاہیے کہ محمد رضوان اور بابر اعظم نے مختصر ترین فارمیٹ کی تاریخ میں سب سے مضبوط اوپننگ جوڑی کے طور پر خود کو قائم کیا تھا، دونوں نے مل کر اپنی ابتدائی شراکت میں 50.04 کی شاندار اوسط کے ساتھ مجموعی طور پر 2452 رنز بنائے جبکہ متعدد ریکارڈز بھی اپنے نام کیے تھے۔ سابق آل راؤنڈر نے کہا کہ اگر مجھ سے پوچھیں تو میں بابراعظم کے ساتھ اوپننگ کیلئے جاؤں گا، ہم ان پر تنقید کر سکتے ہیں لیکن انہوں نے متعدد مرتبہ فتوحات میں اہم کردار ادا کیا ہے۔ بابراعظم نے طویل عرصے سے پاکستان کی عزت اور فخر کے ساتھ خدمت کی ہے۔