وزیراعظم کے ترقیاتی بجٹ پر 53 ارب روپے کا کٹ لگانے کی تیاری

01-29-2024

(ویب ڈیسک) وزیراعظم کے ترقیاتی بجٹ پر 53 ارب روپے کا کٹ لگانے کی تیاری کر لی گئی۔

ذرائع کے مطابق اقدامات کے تحت وزیراعظم کے ترقیاتی بجٹ کیلئے فنڈز روکنے کی تجویز دی گئی ہے جبکہ تجاویز منظوری کیلئے قومی اقتصادی کونسل میں پیش کی جائیں گی۔ ذرائع کے مطابق جولائی سے دسمبر 2023 تک وزیراعظم کی جانب سے کئے گئے اقدامات کے تحت تقریباً 2 ارب جاری کئے گئے اور بجٹ میں 80 ارب روپے کے 9 منصوبے شامل تھے۔ زرعی ٹیوب ویلز کی شمسی توانائی پر منتقلی کے پروگرام کیلئے 30 ارب مختص تھے، بجٹ میں وزیراعظم لیپ ٹاپ سکیم کیلئے 10 ارب روپے مختص کئے گئے تھے جبکہ چھوٹے قرضوں کیلئے وزیر اعظم یوتھ پروگرام کے تحت 10 ارب روپے مختص تھے۔ اسی طرح وزیراعظم یوتھ سکل ڈویلپمنٹ پراجیکٹ کیلئے 5 ارب روپے مختص تھے، پاکستان انڈومنٹ فنڈ برائے ایجوکیشن کیلئے 5 ارب روپے مختص تھے، وزیراعظم آئی ٹی سٹارٹ اپ اور وینچر کیپیٹل پروگرام کیلئے 5 ارب روپے مختص کئے گئے تھے۔ ذرائع نے مزید کہا ہے کہ بجٹ میں وزیراعظم کی جانب سے سپورٹس اقدامات کیلئے 5 ارب روپے مختص کئے گئے تھے، وزیراعظم کے سبز انقلاب پروگرام کیلئے 5 ارب روپے مختص کئے گئے تھے اور خواتین کو بااختیار بنانے کے پروگرام کیلئے 5 ارب روپے فنڈ میں رکھے گئے تھے۔