سردی بڑھتے ہی ایل پی جی کی طلب بڑھ گئی

12-16-2023

(لاہور نیوز) سردی بڑھتے ہی گیس بحران نے سر اٹھا لیا ۔ قدرتی گیس کی بندش اور کم پریشر کی شکایات کے باعث ایل پی جی کی طلب بڑھ گئی۔

شہر کے مختلف علاقوں میں گیس کی بندش اور کم پریشر کی شکایات عام ہونے لگیں۔ شہری متبادل ایندھن ایل پی جی استعمال کرنے پر مجبور ہیں۔ ایل پی جی کی  بلیک مارکیٹنگ کا سلسلہ بھی جاری ہے۔ شہر میں اوگرا ریٹ پر کہیں بھی ایل پی جی دستیاب نہیں۔ اوگرا  نے رواں ماہ ایل پی جی کی قیمت 255 روپے فی کلو مقرر کی۔ مختلف علاقوں میں ایل پی جی 280 سے 300 روپے فی کلو تک فروخت کی جا رہی ہے۔ شہری کہتے ہیں گیس آتی نہیں مجبوراً ایل پی جی استعمال کرنا پڑتی ہے۔ حکومت ایل پی جی کی بلیک مارکیٹنگ کا نوٹس لے۔ چیئرمین ایل پی جی ایسوسی ایشن عرفان کھوکھر نے گیس کی قلت کے خدشے کا بھی اظہار کر دیا۔ ان کا کہنا ہے کہ عالمی مارکیٹ میں قیمتوں میں اضافے سے رواں ماہ ایل پی جی لانے والے دو بحری جہازوں کی پاکستان آمد منسوخ کر دی گئی۔ دونوں جہاز سری لنکا بھیج دئیے گئے۔