خوش قسمت ہوں حمزہ علی عباسی جیسا شوہر ملا: نیمل خاور

12-13-2023

لاہور ( محمد بلال) پاکستانی اداکارہ نیمل خاور نے کہا ہے کہ خود کو خوش قسمت تصور کرتی ہوں کہ حمزہ علی عباسی جیسا اللہ کا خوف رکھنے والا شوہر ملا۔

حال ہی میں اداکارہ نیمل خاور نے دنیا نیوز کے مقبول ترین شو" مذاق رات" میں بطور مہمان شرکت کی جہاں انہوں نے اپنی نجی زندگی سمیت دیگر معاملات پر کھل کر گفتگو کی۔ پروگرام کے دوران گفتگو کرتے ہوئے نیمل خاور کا کہنا تھا کہ  شادی سے قبل میں دعا کرتی تھی کہ میری جس شخص سے شادی ہو اس میں اللہ کا خوف ہو جو آج کل کے زمانے میں لوگوں کے اندر نہیں ہے۔ انہوں نے کہا کہ  میں اپنے آپ کو اتنا خوش نصیب سمجھتی ہوں کہ حمزہ کے اندر اللہ کا خوف ہے اور حمزہ کی اسی خوبی نے مجھے متاثر کیا اور ان سے محبت ہوگئی۔ شوہر حمزہ علی عباسی سے پہلی ملاقات بارے بتاتے ہوئے اداکارہ کا کہنا تھا کہ ہماری پہلی  اور مختصر سی ملاقات ایک فلم کی شوٹنگ کے دوران ہوئی، پھر حمزہ  میری بنائی ہوئی  پینٹنگ کی نمائش دیکھنے آئے ، کچھ ماہ بعد حمزہ نے میرے گھر رشتہ بھیجا، والد کے ساتھ مختصراً ملاقات ہوئی اور پھر رشتہ طے ہوگیا۔ نیمل خاور کا کہنا تھا کہ  ہم دونوں میاں بیوی  ہی دھیمے مزاج کے انسان ہیں، ہماری جب بھی لڑائی ہوتی ہے حمزہ جلدی صلح کرلیتے ہیں۔ اداکارہ کا مزید کہنا تھا کہ  مستقبل میں اداکاری جاری رکھوں گی اور کسی ڈرامے میں رومانوی کردار نبھانے کی خواہاں ہوں۔