وزیراعلیٰ محسن نقوی کا تین ترقیاتی منصوبوں کا 3 گھنٹے طویل دورہ

12-10-2023

(لاہور نیوز) نگران وزیراعلیٰ پنجاب محسن نقوی نے تین ترقیاتی منصوبوں کا 3 گھنٹے طویل دورہ کیا۔

وزیراعلیٰ محسن نقوی نے شاہدرہ فلائی اوورز کی سائیڈ روڈز،راوی کے نئے پل اور بیدیاں انڈرپاس کی سائیڈ روڈز کا تفصیلی معائنہ کیا۔  وزیراعلیٰ محسن نقوی کو شاہدرہ فلائی اوورزکی سائیڈ روڈز کی تعمیر،ڈرین اور راؤنڈ اباؤٹ پر ہونے والی پیش رفت سے آگاہ کیا گیا۔ وزیراعلیٰ نے شاہدرہ فلائی اوورزکی سائیڈ روڈز کی جلد تکمیل یقینی بنانے کا حکم دیتے ہوئے کہا کہ عوام کو درپیش مشکلات کے پیش نظر پراجیکٹ کی تکمیل میں مزید تاخیرنہیں ہونی چاہیے۔ وزیراعلیٰ محسن نقوی نے پل کی تعمیر کے لئے دریائے راوی میں پائلنگ کے عمل کا مشاہدہ کیا۔ بریفنگ میں بتایا گیا کہ راوی پل کے لئے 52 پائلز بنائی جائیں گی، دریا کی وجہ سے احتیاط سے پائلنگ کی جا رہی ہے۔  وزیراعلیٰ محسن نقوی نے بیدیاں انڈر پاس پراجیکٹ کا بھی دورہ کیا، سائیڈ روڈز کے تعمیراتی معیار کا بھی جائزہ لیا۔ وزیراعلیٰ محسن نقوی نے بیدیاں انڈر پاس پراجیکٹ کے معیار کو سراہا اورایل ڈی اے ٹیم کو شاباش دی۔ صوبائی وزراء عامر میر،اظفرعلی ناصر، سیکرٹری ہاؤسنگ، کمشنر لاہور، ڈپٹی کمشنر، ڈی جی ایل ڈبلیو ایم سی، چیف انجینئر ایل ڈی اے اوردیگر متعلقہ حکام بھی اس موقع پر موجود تھے۔