میرے مطابق تاحیات نااہلی کا قانون اب ختم ہو چکا ہے، اعظم نذیر تارڑ

12-08-2023

(لاہور نیوز) سابق وفاقی وزیر قانون اعظم نذیر تارڑ نے کہا ہے کہ تاحیات نااہلی کا کیس صرف نواز شریف کا نہیں۔ میرے مطابق تاحیات نااہلی کا قانون اب ختم ہو چکا ہے۔

مسلم لیگ ن کے رہنماؤں اعظم نذیر تارڑ اور عطا اللہ تارڑ نے لاہور ہائیکورٹ میں میڈیا سے گفتگو کی۔ اعظم نذیر تارڑ نے کہا کہ تاحیات نااہلی کا قانون ختم ہو چکا ہے، اگر سپریم کورٹ تاحیات نااہلی کے خلاف درخواست کو مقرر کر دے تو لوگوں کے خدشات بھی دور ہو جائیں گے، سپریم کورٹ کا ذوالفقار علی بھٹو کی پھانسی کا مقدمہ سننا بہت اچھا اقدام ہے۔ لیگی رہنما عطا اللہ تارڑ کا کہنا تھا کہ عام انتخابات 8 فروری 2024ء کو ہوں گے، سپریم کورٹ کا حکم موجود ہے، الیکشن میں تاخیر نہیں ہو گی، بلاول بھٹو ہمارے لئے قابل احترام ہیں، خواہشات رکھنے پر کوئی پابندی نہیں۔ عطا اللہ تارڑ نے مزید کہا کہ القادر ٹرسٹ قومی خزانے پر سب سے بڑا ڈاکہ ہے، اس کیس میں سابق چیئرمین پی ٹی آئی کو سزا سے بچانا مشکل ہے۔