ہارر فلم 'دیمک' میں فیصل قریشی اور سونیا حسین ایک ساتھ جلوہ گر ہونے کو تیار

11-24-2023

(ویب ڈیسک) پاکستانی شوبز انڈسٹری کے معروف اداکار فیصل قریشی اور اداکارہ سونیا حسین ہارر فلم "دیمک" میں اداکاری کے جوہر دکھائیں گے۔

نجی ٹی وی سے گفتگو کرتے ہوئے فلم کے ہدایتکار رافع راشدی نے بتایا کہ فلم حقیقی کہانی پر مبنی ہے جسے عائشہ مظفر نے لکھا ہے، یہ کہانی ایک فیملی کے ساتھ رونما ہونے والے عجیب و غریب واقعات کی عکاسی کرتی ہے جو پراسرار مخلوق کے زیر اثر ہے۔ ہدایتکار نے فلم کی کاسٹ سے متعلق بات کرتے ہوئے کہا کہ  ڈرامہ سیریل بادشاہ بیگم میں ہدایتکاری کے فرائض نبھاتے وقت فیصل قریشی کے ساتھ کام کرنے کی خواہش تھی جو اب پوری ہوگئی،  فلم کا  سکرپٹ جب فیصل قریشی کو سنایا تو انہوں نے اپنے کردار کے بارے میں تفصیلات پوچھیں۔ انہوں نے کہا کہ  فلم کا سکرپٹ اور گرافکس دیکھ کر  فیصل نے فوراً فلم کرنے کی حامی بھرلی، اسی طرح سونیا نے بھی اسکرپٹ سنا جو انہیں پسند آیا اور انہوں نے بھی فلم میں کام کرنے کے لیے ہاں کردی، سونیا "دیمک" میں فیصل کی اہلیہ کے کردار میں نظر آئیں گی۔ رافع کا مزید کہنا تھا کہ فلم کی کاسٹ میں ثمینہ پیرزادہ، فیصل قریشی کی ماں کا کردار نبھائیں گی جب کہ جاوید شیخ، بشریٰ انصاری اور ثمن انصاری بھی کاسٹ کا حصہ ہوں گے۔