ہمارے گھر میں خواتین کا ہولڈ تھا، والد بھی ڈرتے تھے: شعیب ملک

11-22-2023

(ویب ڈیسک) قومی کرکٹ ٹیم کے سابق کپتان شعیب ملک نے کہا ہے کہ ہمارے گھر میں خواتین کا ہولڈ تھا اورمیری طرح والد بھی ڈرتے تھے۔

فخر عالم کے ساتھ نجی ٹی وی کے پوڈ کاسٹ میں شعیب ملک نے اپنی زندگی کے بارے میں مختلف سوالات کے جوابات دیتے ہوئے کہا کہ  میری بہنیں مجھے سکول بھیجتی تھیں جبکہ والد کرکٹ کے حوالے سے مجھے سپورٹ کرتے تھے اور اُن کی کوشش تھی کہ ’گیارہ‘ میں میرا بھی نام ہو۔ شعیب ملک نے بتایا کہ میں گھر سے سکول کے بیگ میں کٹ چھپا کر لے جاتا تھا اور اس بارے میں والد جانتے تھے مگر بہنوں کو علم نہیں تھا، البتہ جب میں پکڑا جاتا اور مار پڑتی تھی تو والد بیچ میں نہیں آتے تھے جس پر مجھے اندازہ ہوا کہ وہ بھی میری طرح ڈرتے ہیں۔ آل راؤنڈر نے برملا کہا کہ ہمارے گھر میں خواتین کا ہولڈ تھا‘ ہم نے بہت مشکل حالات دیکھے اور کم آمدن میں گھر چلتا تھا، میری دونوں بہنوں نے ملازمتیں کرکے گھر کیلئے سب کچھ کیا۔ شعیب ملک نے کہا کہ اگر میری بہنیں مجھے سپورٹ نہ کرتیں تو میں کرکٹر نہیں بن سکتا تھا۔