والدہ کے انڈسٹری سے تعلق کا فائدہ نہیں ہوا خود اس مقام پر پہنچی ہوں: رابعہ کلثوم

11-19-2023

(ویب ڈیسک) ابھرتی ہوئی پاکستانی اداکارہ رابعہ کلثوم نے کہا ہے کہ والدہ کے شوبز انڈسٹری سے تعلق کا مجھے کوئی فائدہ نہیں ہوا خود محنت کر کے اس مقام پر پہنچی ہوں۔

حال ہی میں اداکارہ رابعہ کلثوم نے نجی ٹی وی شو میں شرکت کی جہاں انہوں نے مختلف موضوعات سمیت اپنے کیریئر کے حوالے سے بھی کھل کر گفتگو کی۔ شوبز میں قدم رکھنے کے حوالے سے بات کرتے ہوئے رابعہ کلثوم کا کہنا تھا کہ  والدہ نے پہلے ہی کہہ دیا تھا کہ وہ کسی سے میری سفارش نہیں کریں گی، میں نے اس پروفیشن کا انتخاب کیا ہے اس لیے مجھے خود محنت کرنی ہے، میں آج جس مقام پر ہوں اس کے پیچھے میری اپنی محنت ہے والدہ کے انڈسٹری سے تعلق کا مجھے کوئی فائدہ نہیں ہوا۔ انہوں نے کہا کہ  والدہ کی وجہ سے مجھے اگر فائدہ ہوتا تو میں کسی بڑے چینل اور مرکزی کردار سے اپنے کیریئر کا آغازکرتی لیکن میں نے سپورٹنگ کرداروں سے اپنا سفر شروع کیا اور آج بھی وہی کر رہی ہوں۔ اداکارہ کا مزید کہنا تھا کہ  میرے شوہر نے بھی شوبز انڈسٹری میں قدم رکھ دیا ہے ، اب ہم ایک ساتھ ایک ڈرامے کی شوٹنگ میں مصروف  ہیں جو جلد ٹی وی پر نشر ہوگا۔ واضح رہے کہ  رابعہ کلثوم ٹیلی ویژن کی نامور سینئر اداکارہ پروین اکبر کی بیٹی،اداکار فیضان شیخ کی بہن اور  اداکارہ ماہم عامر ان کی بھابھی ہیں۔