پاکستان کے قیام اور ترقی میں اقلیتوں کا کردار ناقابل فراموش ہے: شہباز شریف

11-12-2023

(لاہور نیوز) صدر مسلم لیگ ن اور سابق وزیراعظم شہباز شریف نے کہا ہے کہ پاکستان کے قیام اور ترقی میں اقلیتوں کا ناقابل فراموش کردار ہے۔

سماجی رابطے کی ویب سائٹ ایکس (سابق ٹوئٹر) پر شہباز شریف نے ہندو برادری کو دیوالی کے تہوار کی مبارک پیش کرتے ہوئے کہا کہ دیوالی کا بنیادی پیغام برائی پر اچھائی کی فتح ہے۔ انہوں نے کہا کہ ہم سب کو مل کر معاشرے اور دنیا سے برائی کے خاتمے اور اچھائی کے فروغ کیلئے کام کرنا ہوگا، پاکستان کے قیام اور ترقی میں اقلیتوں کا ناقابل فراموش کردار ہے۔ سابق وزیراعظم کا کہنا تھا کہ بابائے قوم قائداعظم محمد علی جناحؒ کے فرمودات کی روشنی میں اقلیتوں کے حقوق کے تحفظ اور فروغ کے عہد کی تجدید کرتے ہیں۔ علاوہ ازیں مسلم لیگ (ن) کی سینئر نائب صدر اور چیف آرگنائزر مریم نواز نے بھی ہندو برادری کو دیوالی کی مبارکباد پیش کرتے ہوئے کہا کہ آپ کی خوشیاں، امن اور ترقی نواز شریف کی قیادت میں ہمیں بے حد عزیز اور مقدم ہے، غیرمسلم پاکستانیوں کے حقوق کا تحفظ ہمیشہ سے ہماری روایت رہی ہے، اس روایت کو مزید جذبے اور آئین کی روشنی میں آگے بڑھائیں گے۔ انہوں نے مزید کہا کہ غیر مسلم پاکستانیوں کو فیصلہ سازی اور ترقی کے عمل میں مزید مواقع دیں گے، اقلیتوں کی ترقی پاکستان کی ترقی اور مضبوطی ہے، آج کے دن ہم اقلیتوں کی وطن عزیز کے دفاع، سلامتی اور ترقی کے لئے خدمات کو خراج تحسین پیش کرتے ہیں۔