نگران وزیراعظم سے گورنر بلیغ الرحمان کی ملاقات ، باہمی دلچسپی کے امور پر تبادلہ خیال

10-31-2023

(لاہور نیوز) نگران وزیراعظم انوار الحق کاکڑ نے گورنر پنجاب محمد بلیغ الرحمان سے ملاقات کی جس میں باہمی دلچسپی کے امور پر تبادلہ خیال کیا گیا۔

وزیراعظم انوار الحق کی گورنر ہاؤس آمد پر محمد بلیغ الرحمان نے ان کا استقبال کیا، نگران وزیراعظم اور گورنر پنجاب نے پنجاب حکومت کی کارکردگی اور صوبے میں جاری منصوبوں پر پیشرفت پر اطمینان کا اظہار کیا۔ گورنر پنجاب نے وزیر اعظم کو ہائر ایجوکیشن کمیشن کی یونیورسٹیوں کو سالا نہ فنڈنگ میں خاطر خواہ کمی کے مسئلے کی طرف متوجہ کیا ۔ محمد بلیغ الرحمان نے کہا کہ یونیورسٹیاں ہائر ایجوکیشن کمیشن کی سالانہ فنڈنگ میں کمی کے باعث خسارے کا شکار ہیں، ہائر ایجوکیشن کمیشن یونیورسٹیوں کی فنڈنگ میں اضافہ اور مالی معاملات میں بہتری لانے میں مدد کرے۔ نگران وزیراعظم انوار الحق کاکڑ نے معاملے میں تعاون کی یقین دہانی کرواتے ہوئے کہا کہ وفاقی حکومت اپنے مینڈیٹ کے مطابق اپنی ذمہ داریوں سے عہدہ برآں ہونے بالخصوص معاشی ترقی کے لیے بھرپور کوششیں کر رہی ہے۔