10 بار فلسطین کا دورہ کیا، اپنی آنکھوں سے ظلم و بربریت دیکھی: چودھری سرور

10-29-2023

(لاہور نیوز) پاکستان مسلم لیگ (ق) کے رہنما چودھری محمد سرور نے کہا ہے کہ میں نے اپنی زندگی میں 10 بار فلسطین کا دورہ کیا اور وہاں اپنی آنکھوں سے ظلم وبربریت دیکھی۔

 فلسطین ریلی کے شرکا سے خطاب میں رہنما مسلم لیگ ق چودھری محمد سرور نے کہا کہ اسرائیل نے فلسطین پر ناجائز قبضہ کر رکھا ہے، 1948ء سے لے کر آج تک اسرائیل فلسطین کے علاقوں پر قابض ہے، فلسطینی صرف اپنا 22 فیصد علاقہ مانگتے ہیں۔ انہوں نے کہا کہ بدقسمتی سے ہیومن رائٹس کو اسرائیل کسی خاطر میں نہیں لاتا، جو ظلم اسرائیل کر رہا ہے وہ کوئی اور ملک کرتا تو معاملہ کچھ اور ہوتا، میں خاموش رہنے پر انٹرنیشنل کمیونٹی کی مذمت کرتا ہوں، لوگ وہاں بھوک سے مر رہے ہیں۔ چودھری محمد سرور نے مزید کہا کہ اسرائیل فلسطین میں انسانی حقوق کی خلاف ورزیاں کر رہا ہے، ہسپتالوں میں علاج معالجے کی سہولیات نہیں، غزہ کے لوگ ایک جیل میں رہ رہے ہیں، یہ پوری دنیا کے مسلمانوں کی ذمہ داری بنتی ہے کہ فلسطینیوں کیلئے آواز بلند کریں۔