پاؤڈر سے تیار 10 ہزار لیٹر زہریلے دودھ کی سپلائی ناکام بنا دی گئی

10-26-2023

(لاہور نیوز) پنجاب فوڈ اتھارٹی نے ڈٹرجنٹ پاؤڈر سے تیار 10 ہزار لیٹر زہریلے دودھ کی جڑواں شہروں کو سپلائی ناکام بنا دی۔

پنجاب فوڈ اتھارٹی حکام کے مطابق  چکری روڈ پر علی الصبح ملاوٹ مافیا کے خلاف کارروائی کرکے10 ہزار لیٹر ملاوٹی دودھ تلف کردیا گیا اور دودھ  لے جانے والی گاڑیوں  کے مالکان کو 40 ہزار روپے جرمانہ عائد کیا گیا۔ حکام نے بتایا کہ ناکہ بندی کے دوران 28 گاڑیوں کو چیک کیا گیا جن میں سے  2 گاڑیوں میں موجود دودھ کے سیمپل ناقص پائے گئے۔ دودھ کو جدید لیکٹوسکین مشین کے ذریعے چیک کیا گیا۔ پنجاب فوڈ اتھارٹی کے حکام نے مجموعی طور پر 1 لاکھ 7 ہزار لیٹر دودھ کا معائنہ کیا اور ملاوٹ ثابت ہونے پر ڈیری سیفٹی ٹیم نے 10 ہزار لیٹر ناقص دودھ تلف کردیا۔  ہزاروں لیٹر ملاوٹی دودھ کوٹ مومن سرگودھا سے اڈیالہ روڈ راولپنڈی میں سپلائی کیا جارہا تھا۔