ڈریپ نے امراض چشم کی دوا کا ایک بیچ غیر معیاری قرار دے دیا

09-27-2023

(ویب ڈیسک) ڈریپ نے امراض چشم کی غیر معیاری دوا کی فروخت پر ایکشن لیتے ہوئے امراض چشم کی دوا کا ایک بیچ غیر معیاری قرار دے دیا۔

ڈرگ ریگولیٹری اتھارٹی پاکستان  (ڈریپ ) نے کومیسیٹن آئی ڈراپس کا پراڈکٹ ری کال الرٹ جاری کر دیا ، کومیسیٹن آئی ڈراپس کا بیچ سی وائے ایف 003 غیر معیاری قرار پایا ہے۔ ڈریپ کے مطابق کومیسیٹن آئی ڈراپس نبی قاسم انڈسٹریز کراچی کی تیار کردہ ہے، کومیسیٹن کا سیمپل صوبائی ڈرگ انسپکٹر جامشورو نے ٹیسٹنگ لیب بھجوایا تھا، دوا کا بیچ فیڈرل ڈرگ اینالسٹ، سی ڈی ایل کراچی نے غیر معیاری قرار دیا۔ ڈریپ نے کومیسیٹن آئی ڈراپس پراڈکٹ الرٹ شہریوں ، ڈاکٹرزاور کیمسٹ کیلئے جاری کیا ہے۔ ڈریپ کے جاری الرٹ میں کہا گیا ہے کہ کومیسیٹن ڈراپس آنکھوں کے بیکٹریل انفیکشن کے علاج کیلئے ہے، ڈاکٹرز مریض کو کومیسیٹن آئی ڈراپس کا متاثرہ بیچ استعمال نہ کرائیں، غیر معیاری دوا کا استعمال مریض کی بینائی کیلئے خطرناک ہو سکتا ہے۔ الرٹ کے مطابق غیر معیاری اینٹی بائیوٹک استعمال سے مرض پیچیدگی اختیار کر سکتا ہے، فارما کمپنی کومیسیٹن آئی ڈراپس کا متاثرہ بیچ سپلائی نہ کرے، کمپنی کومیسیٹن آئی ڈراپس کا متاثرہ بیچ مارکیٹ سے واپس اٹھوائے۔ ڈریپ الرٹ میں مزید کہا گیا ہے کہ کیمسٹ کومیسیٹن آئی ڈراپس کا متاثرہ بیچ فارما کمپنی کو واپس کریں، ڈریپ کی صوبائی ٹیمیں میڈیسن مارکیٹ میں سرویلنس بڑھائیں۔