پنجاب ہائی وے پیڑولنگ پولیس بھی ڈرائیونگ لائسنس جاری کر سکے گی

09-26-2023

(ویب ڈیسک) پنجاب ہائی وے پیڑولنگ پولیس کو بھی ڈرائیونگ لائسنس جاری کرنے کا اختیار دے دیا گیا۔

آئی جی پنجاب نے نوٹیفکیشن جاری کر دیا۔ جس کے مطابق اب راولپنڈی سمیت پنجاب بھر میں ٹریفک پولیس کے ساتھ ساتھ پنجاب ہائی وے پیڑولنگ پولیس کو ڈرائیورنگ لائسنسنگ اتھارٹی کے اختیار حاصل ہوں گے اور اپنی اپنی حدود میں ڈرائیونگ لائسنس جاری کرنے کے مجاز ہوں گے۔ صوبے بھر میں پنجاب ہائی ویز پیڑولنگ پولیس کو اپنی اپنی حدود میں ٹریفک قوانین کی پابندی کرانے کے لیے انفورسمنٹ کے اختیا ر دیے گئے جس میں خلاف ورزی کرنے والے عناصر کو چالان ٹکٹ جاری کرنا بھی شامل تھا۔ معلوم ہوا ہے کہ باقاعدہ منظوری کے بعد پنجاب ہائی وے پیڑولنگ پولیس کو بھی لائسنس جاری کرنے کے اختیارات دے دیے گئے ہیں۔ اس حوالے سے آئی جی پنجاب ڈاکڑ عثمان انور نے نوٹیفکیشن بھی جاری کر دیا ہے ۔ جس کے مطابق پولیس آرڈر 2002 کے آرٹیکل 27 کے تحت پنجاب ہائی وے پیڑولنگ پولیس کے تمام ریجنل آفیسرز اور ڈسڑکٹ آفیسرز کو لائسنسنگ اتھارٹی کا سٹٹیس دیا جا رہا ہے اور انہیں اختیار ہوگا کہ اپنی اپنی ضلعی و ریجن کی حدود کے اندر موٹروہیکل آرڈیننس1965 اور تمام ٹریفک قوانین کے زیر اثر ڈرائیور لائسنس جاری کرسکیں گے۔