ایشین گیمز میں شرکت کیلئے قومی باکسرز کل چین روانہ ہو نگے

09-18-2023

(ویب ڈیسک ) قومی باکسنگ ٹیم کے ہیڈ کوچ ارشد حسین نے کہا ہے کہ ایشین گیمز میں شرکت کیلئے قومی باکسرز کل( منگل کو) چین روانہ ہو نگے۔

خبر رساں ادارے کے مطابق قومی باکسنگ ٹیم کے ہیڈ کوچ نے کہا کہ باکسنگ کا دستہ چار کھلاڑیوں اور دو آفیشلز پر مشتمل ہو گا۔ کھلاڑیوں میں تین مرد اور ایک خاتون باکسر شامل ہیں، جن میں مرد باکسر میں زوہیب رشید، محمد قاسم اور ابراہیم جبکہ خاتون باکسر فاطمہ زہرہ شامل ہیں۔ ٹیم کے ہمراہ کوچنگ کے فرائض اولمپین ارشد حسین دیں گے اور ٹیم منیجر محمود ریاض لغاری ہونگے، ایشین گیمز میں باکسنگ کے ایونٹ میں 45 ممالک کے باکسرز حصہ لیں گے۔ ہیڈکوچ کا کہنا تھا کہ کھلاڑیوں نے تربیتی کیمپ میں تین ماہ تک تربیت حاصل کر رکھی ہے اور امید ہے کہ ایشین گیمز میں کھلاڑی عمدہ کارکردگی کا مظاہرہ کرتے ہوئے ملک و قوم کا نام روشن کریں گے۔ انہوں نے کہا کہ ایشین گیمز میں شرکت کے بعد باکسنگ کا دستہ 3 اکتوبر کو واپس وطن پہنچے گا۔