دریائے ستلج میں پانی کی سطح میں مسلسل اضافہ، درجنوں دیہات زیر آب

08-26-2023

(لاہور نیوز) بھارت کی جانب سے دریائے ستلج میں چھوڑا گیا پانی کا ریلا گنڈا سنگھ والا میں داخل ہوگیا۔

تفصیلات کے مطابق ہیڈ سلیمانکی پر اونچے درجے کا سیلاب ہے جبکہ اگلے 10 سے 12 گھنٹے میں ہیڈ گنڈا سنگھ کے مقام پر پانی کی سطح میں مزید اضافے کا امکان ہے۔ دریائے ستلج میں ہیڈ اسلام پر بھی اونچے درجے کا سیلاب ہے، ہیڈ ورکس اسلام پر پانی کی آمد ایک لاکھ 51ہزار904 کیوسک ہے ، جس کے باعث ہزاروں ایکڑ فصلیں و نشیبی بستیاں زیرآب آگئیں اور درجنوں دیہات ڈوب گئے ہیں۔ دریائے ستلج میں منچن آباد کی حدود میں رتیکا پتن کے مقام پر پانی کی سطح بلند ہونے سے سیلابی پانی نے علاقہ میں تباہی مچا دی، 85 سے زائد آبادیوں میں پانی داخل ہونے سے زمینی رابطہ منقطع ہوگیا اور لوگ گھروں میں محصور ہو کر رہ گئے۔ تیز بہاؤ کے باعث پانی گورنمنٹ گرلز ایلیمنٹری سکول اکبر ماڑی نہال میں داخل ہو گیا ہے، تعلیمی سرگرمیاں معطل ہیں اور علاقہ مکینوں کی منتقلی کاعمل جاری ہے ۔