آج کل ٹیلنٹ نہیں نمبرز کی بنیاد پر کام ملتا ہے: آمنہ ملک

08-21-2023

(ویب ڈیسک) پاکستان شوبز انڈسٹری کی معروف اداکارہ و میزبان آمنہ ملک نے کہا ہے کہ آج کل ٹیلنٹ نہیں نمبرز کی بنیاد پر کام ملتا ہے۔

آمنہ ملک نے حال ہی میں ایک یوٹیوبر کے پوڈ کاسٹ میں شرکت کی جہاں انہوں نے اپنے کیرئیر، شادی اور زندگی میں آنے والی مشکلات کا ذکر کیا۔ آمنہ ملک نے بتایا کہ شوبز انڈسٹری میں کئی اداکارائیں ایسی ہیں کہ اگر ان کا ایک ڈرامہ ہٹ ہوجائے تو وہ سمجھتی ہیں کہ انہیں سب کچھ آتا ہے، ان کے سیکھنے کا عمل وہیں پر ختم ہوجاتا ہے۔  آج کل سوشل میڈیا کا دور ہے تو بلیو ٹک کافی اہمیت رکھتا ہے، کافی اداکاروں نے آدھے سے زیادہ فالوورز خریدے ہوئے ہیں۔ آمنہ نے پوڈ کاسٹ میں نام لیے بغیر بتایا کہ کئی اداکارائیں انٹرویوز میں کچھ اور کہتی ہیں اور جب ڈرامے کے سیٹ پر ملاقات ہوتی ہے تو ان کی شخصیت بالکل الگ ہوتی ہے۔ شوبز اداکارائیں کسی انٹرویو میں جاتی ہیں تو ایسا لگتا ہے کہ دنیا میں ان جیسا رحم دل شخص کوئی نہیں ہے، یہ لوگ جعلی ہوتے ہیں۔ انہوں نے بتایا کہ ’لڑکیاں روزانہ منصوبہ بندی کرتی ہیں کہ آج انہیں کس اداکار کو نیچا دکھانا ہے، لڑکیاں سیٹ پر ایک دوسرے کے ساتھ تصاویر بھی نہیں لیتیں کہ اگر انہوں نے سوشل میڈیا پر تصویر لگا دی تو کہیں اس کے فالوورز نہ بڑھ جائیں، آج کے دور میں ٹیلنٹ کی بنیاد پر نہیں بلکہ نمبرز کی بنیاد پر کام مل رہا ہے۔