مہنگائی کی آؤٹ آف کنٹرول لہر کے باعث باہمی میل ملاقاتوں کا سلسلہ بھی متاثر

08-03-2023

(لاہور نیوز) مہنگائی کی آؤٹ آف کنٹرول لہر کے باعث باہمی میل ملاقاتوں کا سلسلہ بھی متاثر ہونے لگا۔ پٹرول کے نرخوں میں ہونے والے اضافے نے رہی سہی کسر بھی پوری کر دی۔

وہ دن ہوا ہوئے جب بہانے بہانے سے دوست یار اور رشتے دار ایک دوسرے کے ہاں کثرت سے آیا جایا کرتے تھے لیکن اب تو 38 فیصد تک پہنچ جانے والی مہنگائی نے بیشتر احباب کو صرف دال روٹی کے چکر میں ہی اُلجھا کر رکھا دیا ہے۔ جب جسم و جاں کا رشتہ برقرار رکھنا ہی مشکل تر ہو جائے تو پھر سماجی رابطے کیوں کر اپنی اہمیت برقرار رکھ سکتے ہیں۔ ایک اندازہ ہے کہ ایک دوسرے کے ساتھ میل ملاقاتوں کے سلسلہ میں پہلے کی نسبت قریب قریب 30 سے 35 فیصد تک کمی آچکی ہے۔ ستم بالائے ستم تو یہ بھی ہے کہ آنے والے دنوں میں دور دور تک صورت حال میں بہتری کا امکان دکھائی نہیں دے رہا۔ ماہرین نفسیات کے نزدیک  معاشرے کے یہ رجحانات خطرناک ہیں۔ حقیقت یہ بھی ہے کہ اب بیشتر احباب نے امید کا دامن ہی ہاتھ سے چھوڑ دیا ہے۔