پاکستان میں مہنگائی کم ہونے کے اندازے غلط قرار

08-02-2023

(ویب ڈیسک) امریکی جریدے کے ماہرین نے پاکستان میں مہنگائی کم ہونے کے اندازوں کو غلط قرار دیتے ہوئے کہا ہے کہ مہنگائی کم نہیں بلکہ اور بڑھے گی۔

غیر ملکی خبر رساں ایجنسی کے ماہرین کے مطابق پاکستان میں اگلے سال مہنگائی کم نہیں ہوگی اور سٹیٹ بینک پاکستان کو شرح سود مزید بڑھانا ہوگا۔ انہوں نے کہا کہ پاکستان کے عالمی مالیاتی ادارے (آئی ایم ایف) سے معاہدے کی وجہ سے بجلی اور گیس کی قیمتیں بڑھانا لازم ہو گا اور یہ مہنگائی بڑھانے کی وجہ بنیں گے۔ پاکستان میں روزہ مرہ کی اشیا تقریباً 40 فیصد کی شرح سے مہنگی ہو رہی ہیں اور آئی ایم ایف کا اوسط مہنگائی کا اندازہ 26 فیصد جبکہ سٹیٹ بینک کا اندازہ 20 سے 22 فیصد ہے۔ واضح رہے کہ گزشتہ دنوں گورنر سٹیٹ بینک جمیل احمد نے شرح سود 22 فیصد پر برقرار رکھنے کا اعلان کرتے ہوئے کہا تھا کہ مانیٹری پالیسی کمیٹی کے مطابق آنے والے مہینوں میں مہنگائی میں کمی متوقع ہے۔