شاہ محمود، اسد عمر جے آئی ٹی میں پیش، 9 مئی واقعات سے اظہار لاتعلقی

07-08-2023

(لاہور نیوز) 9 مئی واقعات کے مقدمات میں پی ٹی آئی کے رہنماؤں شاہ محمود قریشی اور اسد عمر نے جے آئی ٹی میں پیش ہو کر بیانات قلمبند کرا دیئے، شاہ محمود قریشی اور اسد عمر نے 9 مئی واقعات سے لاتعلقی کا اظہار کر دیا۔

شاہ محمود قریشی نے اپنے بیان میں کہا ہے کہ  تحریک انصاف کا وائس چیئرمین ہوں اور دو بار وزیر خارجہ رہ چکا ہوں ، ہمیشہ پاکستان کے اداروں کا احترام کیا ہے، قانون کی حکمرانی پر یقین رکھتا ہوں ، 9 مئی کو چیئرمین تحریک انصاف کی گرفتاری پر کراچی سے اسلام آباد پہنچا ۔ پی ٹی آئی رہنما شاہ محمود قریشی نے بیان میں مزید کہا کہ نو مئی کو ہونے والے واقعات قابل مذمت ہیں ، لاہور میں ہونے والے واقعات سے لاعلم ہوں اور لاتعلقی کا اظہار کرتا ہوں، دس مئی کو گلگت بلتستان ہاوس میں موجود تھا کہ پولیس نے گرفتار کر لیا ، ماضی بے داغ ہے، نو مئی کی کسی سرگرمی میں ملوث نہیں ہوں ۔  اسد عمر کے جے آئی ٹی کو دیے گئے بیان کی تفصیلات بھی سامنے آگئیں۔ اسد عمر کا اپنے بیان میں کہنا ہے کہ  نو مئی کو بذریعہ فلائٹ کراچی سے اسلام آباد پہنچا ، دس مئی کو اسلام آباد ہائیکورٹ سے گرفتار کر لیا گیا ، نو مئی واقعات کی کئی بار مذمت کر چکا ہوں اور واقعات سے لاتعلقی کا اظہار بھی کر رکھا ہے ، عسکری ٹاور جلانے سے میرا کوئی تعلق واسطہ نہیں ہے ، بے گناہ ہوں، اس مقدمے میں بے گناہ قرار دیا جائے۔  یاد رہے کہ انسداد دہشتگری عدالت نے شاہ محمود قریشی اور اسد عمر کی عبوری ضمانت میں 21 جولائی تک توسیع کر رکھی ہے۔