عید کی چھٹیاں ختم، پردیسیوں کی آبائی علاقوں سے لاہور واپسی

07-03-2023

(لاہور نیوز) عید قربان اپنے پیاروں کے ساتھ منانے کے بعد پردیسیوں کی لاہور واپسی کا سلسلہ شروع ہوگیا، ریلوے سٹیشن پر مختلف ٹرینوں کے ذریعے ہزاروں پردیسی لاہور واپس پہنچے۔

مختلف شہروں سے پردیسی اپنے پیاروں کو چھوڑنے  کا غم اور اداس چہروں کے ساتھ واپس لاہور پہنچے، پردیسیوں کا کہنا تھا کہ عید کی چھٹیاں گزرنے کا پتا ہی نہیں چلا، روزی کی خاطر اپنے پیاروں سے دور ہیں مگر عید پر ان کے ساتھ خوب لطف اٹھایا ، اب کام کرنے کا وقت ہے۔ یاد رہے عید کے موقع پر پردیسیوں کی بڑی تعداد میں آبائی علاقوں میں واپسی کے پیش نظر ریلوے انتظامیہ کی جانب سے خصوصی ٹرینیں بھی چلائی گئی تھیں۔ ادھر پردیسیوں کی واپسی کے باعث شہر کے لاری اڈوں پر بھی رش دیکھنے میں آیا، سرکاری ، غیر سرکاری ملازمین اہل خانہ کے ہمراہ واپس لاہور پہنچے، پردیسی عید کی خوشیاں سمیٹنےکے بعد ایک بار پھر سے معمول کی زندگی گزارنے اور اپنے کاروباری معاملات انجام دینے کی بھرپور تیاری میں نظر آئے۔