ون ڈے ورلڈکپ کے شیڈول کا اعلان 27 جون کو متوقع

06-21-2023

(ویب ڈیسک) آئی سی سی مینز کرکٹ ون ڈے ورلڈکپ 2023 کے شیڈول کا اعلان 27 جون کو کیے جانے کا امکان ہے۔

میڈیا رپورٹس کے مطابق شیڈول ورلڈکپ کے 100 دن کے کاؤنٹ ڈاؤن کے موقع پر سامنے لایا جاسکتا ہے، 5 اکتوبر سے بھارت میں ہونے والے ورلڈکپ کے آغاز سے 100 دن کا کاؤنٹ ڈاؤن 27 جون سے شروع ہو گا۔ ذرائع کی جانب سے بتایا جارہا ہے کہ شیڈول میں تاخیر پاکستان کی طرف سے چند وینیوز پر اعتراضات کی وجہ سے ہوئی، اس سے قبل شیڈول ورلڈ ٹیسٹ چیمپئن شپ کے فائنل کے موقع پر جاری ہونا تھا جو بھارت اور آسٹریلیا کے درمیان کھیلی گئی۔ ذرائع کے مطابق پاکستان نے افغانستان کے خلاف میچ چنئی اور آسٹریلیا کے خلاف بنگلور کے میچز کے وینیو کو بدلنے کا کہا تھا، پاکستان نے کنڈیشنز کی بنیاد پر چنئی اور بنگلور کو تبدیل کرنے کا کہا ہے۔ اس کے علاوہ پاکستان نے افغانستان کے خلاف وارم اپ میچ بدلنے کا بھی کہا تھا کیونکہ پاکستان نے کسی غیر ایشین ٹیم سے وارم اپ میچ رکھنے کا کہا ہے تاہم سکیورٹی کے علاوہ وینیوز تبدیل کرنے کے لیے مضبوط وجہ بتانا ضروری ہے، مضبوط وجہ نہ ہونے کی بنیاد پر پاکستان کا مؤقف تسلیم کیے جانے کا امکان نہیں ہے۔