بد قسمتی سے سرجریز حسن کا عالمی معیار بن چکی ہیں: حمیرا اصغر

06-13-2023

(ویب ڈیسک) پاکستانی ماڈل اور اداکارہ حمیرا اصغر نے کہا ہے کہ فیشن انڈسٹری میں ایک عام چہرے والے ماڈل کو سرجریز کرانے کا ہی مشورہ دیا جاتا ہے، بد قسمتی سے سرجریز حسن کا عالمی معیار بن چکی ہیں۔

ان کا کہنا تھا کہ فیشن کی دنیا میں اب حسن کا معیار بدل رہا ہے، ایک عام چہرے والی ماڈل کو بھی اپنے چہرے کے نقش کو نکھارنے کے لیے مختلف سرجریز کا مشورہ دیا جاتا ہے کہ بوٹکس کروا لو ، یا آئی براوز کو لفٹ کروا لو ، ناک کی سرجری کروا لو وغیرہ وغیرہ۔ حمیرا نے کہا کہ یہ ٹریٹمنٹس فیشن کے لیے تو ضروری ہیں تاہم اب بھی ٹی وی ڈراموں میں عام چہروں کو ہی لیا جاتا ہے، بیوٹی کا یہ معیار ٹی وی کے لیے ضروری نہیں ہے بلکہ یہ فیشن کے برعکس ہے۔ حمیرا اصغر نے کہا کہ بد قسمتی سے حسن کا اب فیک معیار ہی ٹرینڈ کر رہا ہے، ایک خاص انداز کی ناک، چہرے کی بناوٹ کا ایک خاص انداز ہو یا ہونٹوں کا بوٹکس کر لیا جائے، چونکہ سب سرجری ہے یا یہ کہیں کہ پلاسٹک کی سب کی شکلیں ایک جیسی نظر آتی ہیں۔ حمیرا کا  مزیدکہنا تھا کہ انہوں نے جب اپنا کیریئر ماڈلنگ سے ٹی وی میں شفٹ کیا تو ان کو پھر یہ کہا جانے لگا کہ بالوں کو نیچرل کلر میں کریں، اپنی جلد کا خیال رکھیں کیونکہ آپ جیسی ہیں ویسا ہی اچھا ہے۔