شہباز شریف کا دورہ ترکیہ: البیراک، زورلو گروپ اور ترک کنٹریکٹرز کی ملاقاتیں

06-03-2023

(لاہور نیوز) وزیر اعظم شہباز شریف سے انقرہ میں البیراک گروپ، سنان۔ آک (زورلو گروپ) اور ترک کنٹریکٹرز ایسوسی ایشن کے وفود نے ملاقاتیں کیں۔

وفود سے ملاقاتوں میں وزیراطلاعات مریم اورنگزیب، معاون خصوصی طارق فاطمی اور ترکیہ میں پاکستان کے سفیر ڈاکٹر یوسف جنید بھی شریک ہوئے۔البیراک گروپ کے بورڈ آف ڈائریکٹر کے چیئرمین احمد البیراک سے ملاقات میں وزیراعظم نے البیراک گروپ کے پاکستان میں منصوبوں کی پذیرائی کی، البیراک گروپ نے پاکستان میں کم لاگت رہائشی منصوبوں، ویسٹ مینجمنٹسمیت دیگر منصوبوں میں گہری دلچسپی سے آگاہ کیا۔ اس سے قبل وزیراعظم محمد شہباز شریف سے سنان-آک (زورلو گروپ) نے ملاقات کی، ملاقات میں زورلو گروپ کے پاکستان میں وِنڈ پاور اور شمسی توانائی کے منصوبوں کے حوالے سے گفتگو کی گئی۔وزیراعظم کو زورلو گروپ کی پاکستان میں الیکٹرانکس، توانائی اور دیگر شعبوں میں سرمایہ کاری میں دلچسپی کے بارے میں آگاہ کیا گیا۔