چودھری شجاعت کی حکومت کو نیشنل ڈائیلاگ شروع کرنے کی تجویز

03-19-2023

(لاہور نیوز) پاکستان مسلم لیگ ق کے سربراہ چودھری شجاعت حسین نے ملکی سیاسی حالات کے تناظر میں وفاقی حکومت کو نیشنل ڈائیلاگ شروع کرنے کی تجویز دے دی۔

پاکستان مسلم لیگ ق کے سربراہ چودھری شجاعت حسین نے کہا ہے کہ ملکی سیاسی حالات بہت زیادہ پیچیدہ ہیں، سیاستدان آگ پر تیل نہ ڈالیں، ملک جلاؤ، گھیراوٴ کا متحمل نہیں ہو سکتا، حکومت نیشنل ڈائیلاگ شروع کرے، ناراض قومی رہنماؤں کے پاس جانے کے لیے تیار ہوں، تمام قوتیں مل بیٹھ کر پاکستان کا سوچیں۔ سابق وزیراعظم کا کہنا تھا کہ 50 سال سیاسی سفر کے ہو گئے، ملک کے اتنے پیچیدہ حالات نہیں دیکھے، یہ وقت ایک دوسرے پر الزام تراشی کا نہیں، نیشنل ڈائیلاگ وقت کی ضرورت بن چکا ہے، وفاقی حکومت کو چاہیے کہ قومی ڈائیلاگ کا آغاز کرے، تمام سیاسی رہنماؤں کو اکٹھا کرے، ملکی حالات میں اتحاد وقت کی ضرورت بن چکا ہے، تمام سیاسی رہنماؤں کو اس بارے سوچنا ہو گا۔