عالمی سب میرین کیبل میں خرابی کے باعث پاکستان میں انٹرنیٹ سروس تعطل کا شکار

11-19-2026

(ویب ڈیسک)عالمی سب میرین کیبل میں خرابی کے باعث پاکستان میں انٹرنیٹ سروس جزوی تعطل کا شکار ہو گئی، پی ٹی اے متعلقہ اداروں اور سٹیک ہولڈرز کے ساتھ قریبی رابطے میں ہے۔

پی ٹی اے کے مطابق بین الاقوامی سب میرین کیبل سسٹمز میں سے ایک، SEA-ME-WE-5 (SMW5) میں پاکستان کے ساحل سے تقریباً 11 کلومیٹر کے فاصلے پر خرابی کی نشاندہی ہوئی ہے جس کے باعث بعض انٹرنیٹ صارفین کو وقفے وقفے سے کنیکٹیویٹی کے مسائل اور سروس کے معیار میں کمی کا سامنا کرنا پڑ سکتا ہے۔ ٹرانس ورلڈ ایسوسی ایٹس (ٹی ڈبلیو اے) خرابی کی اصل وجہ معلوم کرنے اور انٹرنیٹ سروس کی بحالی کے متوقع وقت کا تعین کرنے کیلئے ایس ایم ڈبلیو فائیو  کنسورشیم کے ساتھ رابطے میں ہے، اس دوران ممکنہ اثرات کو کم سے کم کرنے اور انٹرنیٹ سروس کا تسلسل برقرار رکھنے کیلئے انٹرنیٹ ٹریفک کو متبادل بین الاقوامی کیبل لنکس کے ذریعے منتقل کیا جا رہا ہے۔ پی ٹی اے کے مطابق پی ٹی اے متعلقہ اداروں اور سٹیک ہولڈرز کے ساتھ قریبی رابطے میں ہے اور ملک بھر میں انٹرنیٹ سروسز کی معمول کے مطابق جلد از جلد بحالی کیلئے صورتحال کی مسلسل نگرانی جاری رکھے ہوئے ہے۔