مکہ مکرمہ پر ڈرون حملے کی کوشش ناقابل قبول، حرمین شریفین کی سلامتی سرخ لکیر ہے: وزیراعظم

09-26-2026

(لاہور نیوز) وزیراعظم پاکستان شہباز شریف نے کہا کہ میں نے اقوام متحدہ کی جنرل اسمبلی کے اکیسویں اجلاس میں اپنی تقریر کے دوران سعودی عرب کے لیے پاکستان کی حمایت اور خطے میں امن و استحکام کے لیے ہماری پُرعزم حمایت کا اظہار کیا۔

سماجی رابطے کی سائٹ ایکس پر اپنے بیان میں وزیراعظم شہباز شریف نے کہا کہ ہم ایک بار پھر سعودی عرب کے خلاف حوثیوں کی جانب سے کیے گئے حالیہ افسوس ناک حملوں کی سخت ترین الفاظ میں مذمت کرتے ہیں۔ شہباز شریف نے کہا کہ مقدس شہر مکہ مکرمہ پر ڈرون حملے کی کوشش نے دنیا بھر کے مسلمانوں میں شدید غم و غصہ پیدا کیا ہے، حرمین شریفین کے امن، سلامتی اور تقدس کے لیے کسی بھی قسم کا خطرہ ایک ایسی سرخ لکیر ہے جسے کسی بھی صورت عبور نہیں کیا جا سکتا، کوئی بھی مسلمان ایسے گھناؤنے اقدام کا تصور تک نہیں کر سکتا۔   وزیراعظم نے کہا کہ پاکستان، جیسا کہ اپنی تاریخ کے دوران ہمیشہ کرتا آیا ہے، اپنے برادر سعودی عوام کے ساتھ مکمل یکجہتی کے ساتھ کھڑا ہے۔ شہباز شریف نے کہا کہ امن کے لیے ہماری پُرعزم وابستگی مکہ مکرمہ میں برادر ممالک سعودی عرب، ترکیہ اور پاکستان کے درمیان طے پانے والے تاریخی مشترکہ دفاعی معاہدے سے بھی عیاں ہوتی ہے۔ وزیراعظم نے مزید کہا کہ یہ اتحاد کسی بھی ملک کے خلاف نہیں ہے بلکہ خطے کے دفاع، سلامتی، استحکام اور امن کے فروغ کے لیے ایک اجتماعی عزم کی نمائندگی کرتا ہے۔