ایشین گیمز میں بھارت سے سامنا ہوا تو بھرپور مقابلہ کریں گے، ہیڈ کوچ مائیک ہیسن

09-23-2026

(لاہور نیوز) پاکستان کرکٹ ٹیم کے ہیڈ کوچ مائیک ہیسن نے کہا ہے کہ قومی ٹیم کل ایشین گیمز میں شرکت کیلئے روانہ ہو گی، ایشین گیمز کیلئے منتخب سکواڈ میں نوجوان کھلاڑیوں کے ساتھ سینئرز کا کمبی نیشن بنایا گیا ہے۔

میڈیا سے گفتگو کرتے ہوئے مائیک ہیسن نے کہا کہ ایشین گیمز کیلئے سکواڈ کا انتخاب 5 ماہ قبل کیا گیا تھا، منتخب ٹیم اچھی ہے اور جاپان کی کنڈیشنز سازگار رہیں تو ہماری بیٹنگ کافی بہتر ہے۔ انہوں نے سلمان مرزا کی انجری پر مایوسی کا اظہار کرتے ہوئے کہا کہ وہ گزشتہ 3 روز سے کراچی میں موجود ہیں، جبکہ شاہنواز دہانی کے ساتھ پہلے بھی کام کر چکے ہیں۔ مائیک ہیسن نے کہا کہ بھارت اچھی کرکٹ کھیل رہا ہے، اگر ایشین گیمز میں بھارتی ٹیم سے سامنا ہوا تو پاکستان بھرپور مقابلہ کرے گا۔ ہیڈ کوچ کا کہنا تھا کہ ہماری ٹیسٹ ٹیم اچھا پرفارم نہیں کر رہی، تاہم ٹی20 ٹیم دنیا کی چوتھی یا پانچویں بہترین ٹیم ہے، جبکہ ون ڈے کرکٹ میں قومی ٹیم کی کارکردگی بہتر ہو رہی ہے۔