رواں سال پنجاب پولیس 1787 کمپلینٹ سینٹر پر 78 ہزار سے زائد شکایات حل

08-10-2026

(لاہور نیوز) پنجاب پولیس کے آئی جی پی کمپلینٹ سینٹر 1787 پر شہریوں کی شکایات کے ازالے کا سلسلہ جاری ہے۔

ترجمان پنجاب پولیس کے مطابق رواں سال 1787 کمپلینٹ سینٹر پر موصول ہونے والی 78 ہزار سے زائد شکایات کو حل کیا جا چکا ہے، رواں سال مقدمات کے اندراج سے متعلق 37 ہزار 527، سست تفتیش کی 17 ہزار 638 شکایات حل کی گئیں، پولیس سروسز سے متعلق 6 ہزار 20 جبکہ محکمانہ معاملات اور دیگر نوعیت کی 17 ہزار 754 شکایات کا ازالہ کیا گیا۔ اسی طرح ملزمان کی گرفتاری سے متعلق 3 ہزار 908، ریکوری سے متعلق 5 ہزار 999 اور ناقص تفتیش کی 3 ہزار 749 شکایات حل کی گئیں، جھوٹے مقدمات کی منسوخی سے متعلق ایک ہزار 819 جبکہ تبدیلی تفتیش سے متعلق ایک ہزار 336 شکایات بھی حل کی جا چکی ہیں۔ آئی جی پنجاب عبدالکریم کے مطابق شہریوں کی جانب سے موصول ہونے والی شکایات کو ایس او پیز کے مطابق مقررہ ٹائم لائن کے اندر حل کیا جا رہا ہے، 1787 آئی جی پی کمپلینٹ سینٹر کی کارکردگی کو مزید مؤثر بنانے کیلئے مانیٹرنگ کا عمل بھی فعال کیا گیا ہے۔ آئی جی پنجاب نے بتایا کہ تمام ڈی پی اوز 1787 کمپلینٹ سسٹم پر موصول ہونے والی شکایات کے فوری ازالے کیلئے معاملات کی خود نگرانی کر رہے ہیں، انہوں نے شہریوں سے اپیل کی ہے کہ پولیس اہلکاروں کے خلاف کسی بھی شکایت کی صورت میں بلا جھجھک آئی جی پی کمپلینٹ سینٹر 1787 پر رابطہ کریں۔