وزیراعلیٰ پنجاب کا وہاڑی، لودھراں میں بھی بس چلانے کا حکم

06-30-2026

(لاہور نیوز) وزیراعلیٰ پنجاب مریم نواز شریف کی زیرصدارت ٹرانسپورٹ و ماس ٹرانزٹ ڈیپارٹمنٹ کا اہم اجلاس منعقد ہوا، جس میں فیصل آباد اور گوجرانوالہ کے ماس ٹرانزٹ منصوبوں سمیت صوبے میں الیکٹرک بسوں کی فراہمی پر پیش رفت کا تفصیلی جائزہ لیا گیا۔

اجلاس میں بریفنگ دی گئی کہ فیصل آباد اور گوجرانوالہ میں جدید ماس ٹرانزٹ سسٹم پر تیزی سے کام جاری ہے، جبکہ دونوں منصوبوں سے متعلق تفصیلی پراگریس رپورٹ بھی پیش کی گئی۔ اجلاس کو بتایا گیا کہ پنجاب میں اس وقت چلنے والی 400 بسوں کو جلد الیکٹرک بسوں میں تبدیل کیا جائے گا، جبکہ مختلف اضلاع کے لیے نئی 189 الیکٹرک بسیں سافٹ لانچنگ کے لیے تیار ہیں۔ وزیراعلیٰ مریم نواز شریف نے ان بسوں کے آن لائن افتتاح کا عندیہ بھی دیا۔ بریفنگ کے دوران بتایا گیا کہ مزید 488 الیکٹرک بسیں 20 جولائی کو چین کی بندرگاہ سے پنجاب روانہ کی جائیں گی تاکہ مختلف اضلاع میں جدید پبلک ٹرانسپورٹ کی سہولت کو مزید وسعت دی جا سکے۔ وزیراعلیٰ نے کوٹ ادو، تلہ گنگ اور تونسہ شریف میں بھی الیکٹرک بس سروس جلد شروع کرنے کی ہدایت کرتے ہوئے وہاڑی اور لودھراں میں بھی بس سروس کا آغاز کرنے کا حکم دیا۔ انہوں نے وہاڑی، لودھراں اور ننکانہ صاحب میں الیکٹرک بسوں کی تعداد بڑھانے کی ہدایت کرتے ہوئے کہا کہ جہاں 15 سے کم بسیں موجود ہیں وہاں کم از کم 15، 15 بسیں فراہم کی جائیں۔ اجلاس میں گوجرانوالہ ماس ٹرانزٹ منصوبے کے 19.5 کلومیٹر طویل روٹ پر ایک مزید سٹیشن شامل کرنے کی منظوری دی گئی، جس کے بعد سٹیشنز کی مجموعی تعداد 25 ہو گئی ہے۔ وزیراعلیٰ مریم نواز شریف نے ماس ٹرانزٹ منصوبوں کی تعمیر کے دوران حفاظتی اقدامات پر سختی سے عمل درآمد یقینی بنانے کی بھی ہدایت کی۔